Mag-asawa, huli matapos bentahan ng pekeng ginto ang isang gold expert

Dinakip ng mga awtoridad sa Digos City, Davao del Sur  ang isang mag-asawa matapos silang isumbong ng isang gold expert na bentahan umano nila ng mga pekeng ginto.

Sa ulat ng GMA News TV's "Balita Pilipinas Ngayon" nitong Miyerkules, sinabing galing pa sa Bataan ang mag-asawang nagbebenta ng mga pekeng ginto.



Hinuli ng mga pulis ang dalawa matapos silang isumbong ng kanilang bibiktimahin. Nakuha sa kanilang mga piraso ng pekeng ginto at pekeng gold dust.

Depensa naman ng mag-asawa, hindi nila alam na peke ang ibinebenta nilang ginto na nabili lang daw nila sa Tagum city, Davao Norte.

Sinabi ng pulisya na talamak talaga ang bentahan ng pekeng ginto sa Davao del Sur lalo na ngayong panahon ng kapaskuhan. -- FRJ, GMA News