Panindang gulay sa Benguet, nabubulok na; sakahan naman sa Ilocos, nalubog sa baha

Dumadaing na umano ang mga nagtitinda ng gulay sa La Trinidad, Benguet  dahil nabubulok na ang kanilang mga paninda dahil sa pinsala ng Habagat. Sa ulat ng GMA News TV's Balita Pilipinas Ngayon nitong Biyernes, sinabing karamihan sa mga tindang gulay ay nababad sa tubig bunga ng ilang araw na pag-ulan. Kakaunti rin umano ang mga namimili kaya nakaimbak na lang ang kanilang mga tindang gulay. Sa Badoc, Ilocos Norte, ekta-ektarya naman ng palayan ang napinsala ng baha matapos umapaw ang kalapit na ilog. Laking panghihinayang ng magsasaka sa barangay Bato dahil malapit na umano sanang anihin ang kanilang palay na nasira ng baha. - FRJ, GMA News