Mga trabaho na may mataas na sahod sa Pinas

Alam n'yo ba na hindi masyadong "sikat" ang mga trabaho sa Pilipinas na mayroong mataas na sahod. Isa sa mga trabahong ito ay nasa ilalim ng creative industry na aabot ang buwanang sweldo sa halos P70,000. Batay sa pag-aaral ng Bureau of Local Employment (BLE), sinabi ni Sec. Rosalinda Baldoz ng Department of Labor and Employment (DOLE), na sa nakalipas na limang taon, ang mga trabahong hindi masyadong popular ang mayroong malalaking sahod. Ang mga trabahong ito ay nasa creative industries, aviation, banking and finance, business process outsourcing, creative industries, cyber services, manufacturing, at mining. Ang top 10 jobs na may matataas na sahod ay ang: - Art director: P69,286 a month - Geologist: P64,889 a month - Aircraft pilot/navigator/flight engineer: P57,789 a month - Mining/metallurgical engineer: P55,638 a month - Computer programmer: P43,573 a month - Systems analyst/designer: P42,112 a month - Production supervisor/general foreman: P36,133 a month - Actuarian: P35,480 a month - Call center representative/customer service associate: P35,424 a month, at - Statistician: P35,010 a month. Malaking problema ngayon ng bansa ang tinatawag na job mismatch o maraming bakanteng trabaho pero hindi mapunan dahil hindi akma sa kursong kinuha ng aplikante. Kaya payo ni Baldoz sa mga mag-aaral na kukuha ng kurso sa kolehiyo, huwag basta makikisabay sa kung ano ang "uso." "I also advise them to refrain from choosing courses based on what's in vogue or fashionable, or, to use the popular social lingo of the youth, what's 'trending' and popular. Just because a neighbor's son or daughter will take up this or that course does not mean you should follow suit," payo ng kalihim. - FRJimenez, GMA News