Tubig sa balon at poso sa isang barangay sa Janiuay, Iloilo, nagliliyab

Nagliliyab kapag sinindihan ng apoy ang tubig na nanggagaling sa poso at balon sa barangay Aquino West sa bayan ng Janiuay, Iloilo, ayon sa ulat ng Balita Pilipinas Ngayon ng GMA News TV. Sa ulat ni Nenita Hobilla ng GMA-Iloilo, sinabi nito na pinaghihinalaan ng mga residente na ang isang gasolinahan na malapit sa kanilang lugar ang dahilan ng kontaminasyon ng kanilang tubig. Dahil nangangamoy gasolina na rin ang balon at poso, nangangamba na ang mga residente para sa kanilang kalusugan at kaligtasan. Apektado na rin umano ang kabuhayan ng mga tao sa lugar. Kinumpirma naman ng Municipal Environment and Natural Resources Office ng Janiuay na kontaminado ng gasolina ang tubig sa barangay Aquino West. Gayunpaman, hindi pa tiyak kung sa gasolinahan na malapit sa lugar nanggaling ang kontaminasyon. Bagaman naniniwala naman ang pamunuan ng gasolinahan na maayos ang kanilang pasilidad, nakahanda naman silang makipagtulungan sa gagawing imbestigasyon para maayos ang problema sa tubig ng mga residente sa Brgy Aquino West. - FRJ, GMA News