Mangingisda patay nang mabagsakan ng lalaking tumalon sa tulay sa Cebu

Patay ang isang mangingisda sa Cebu nang mabagsakan siya ng isang lalaking tumalon mula sa ibabaw ng Mandaue-Mactan bridge nitong Miyerkules ng gabi. Sa ulat ng GMA News TV’s Quick Response Team (QRT) nitong Huwebes, sinabing nanghuhuli ng isda sa ilog na nasa ilalim ng tulay ang biktimang si Danilo Sison, nang mabagsakan siya ni Aniano Berdin. Sa tindi ng pagkakadagan, nagtamo ng pinsala sa ulo ang biktima na dahilan ng agad nitong kamatayan. Samantala, nadakip naman si Berdin na nagtamo ng pasa sa mukha. Sa himpilan ng pulisya, tumanggi si Berdin na magsalita tungkol sa naganap na insidente kaya hindi pa malinaw kung bakit ito tumalon mula sa ibabaw ng tulay. – FRJ, GMA News