Summer Fun: Haven's Mountain Peak sa Maragusan, Comval

Sagad kanato buot mudayo ug mga lagyong lugar karong summer aron maka-relax o di ba kaha maka-lulinghayaw kauban ang mga mahal sa kinabuhi. Apan dili na nato kinahanglan nga mubiyahe pa ug layo sanglit ang rehiyon onse may mga nindut nga dapit diin mamahimo kang mag-enjoy. Sama na lamang niining usa ka resort nga nahimutang sa probinsya sa comval diin mas nailhan gumikan daw naa na ka sa Baguio. Wala pa man kayo kini nailhan nga destinasyon alang sa mga turista apan ang Maragusan diin usa ka first class municipality sa Compostela Valley Province aduna nay ikapasigarbo nga mga nature's wonders sama sa waterfalls ingon presko ug bugnaw nga hangin. Ang pangalan nga Maragusan nag gikan sa pinulungang mansaka diin gilangkuban kini sa duha ka pulong. Una ang "mara" nga nagpasabot “uga" ug "agusan" nga sa ato pa nag-dagayday nga suba. Ugaling makadesisyon ka nga dayuhon ang maong lugar, mamahimo kang muduaw niining sa usa sa mga sikat nga mountain resorts dinhi. Kini kasamtangang nahimutang ibabaw sa Tarago hills ug gi-ablihan niadtong 2005. Apan una pa man ka makaabot dinhi, kinahanglan una nimo latason ang 208 ka ang-ang pasaka. Inig abot nimo sa taas nga bahin niini, dili na gayud igsapayan ang imong kakapoy nga mabati gikan sa pagbaktas sanglit siguradong madayeg gayud ka sa kanindut sa imong makit-an dinhi. Gawas sa mga talan-awon, nailhan usab ang maong resort gumikan sa ilang mga lami-an nga mga pagkaon. Kung buot nimo ma-refresh gikan sa tumang kainit, mamahimo kang maligo niining mga swimming pool dinhi. Dili lamang sa buntag mamahimo kang maligo dinhi sanglit mas nindut kini panahon sa gabii. Ug tungod mahiligun man ang mga Pinoy pag-abot sa kinantahay, dili gayud mawala dinhi ang videoke diin mamahimo kang mukanta solo o di ba kaha kauban ang mga higala. Samtang gibida usab dinhi ang mga managlahing lawak diin gibase sa nagkalain-laing tribo sa mindanao. Dinhi mamahimo kang mag-relax o magpahulay ilabi pa kung gikan ka sa layo nga byahe. Samtang walay ikabalaka sa seguridad sanglit sulod sa 24 oras, nakabantay ang mga security personnel sa maong resort. Inig mata nimo sa buntag, usa sa mga talagsaong kasinatian dinhi nga dili nimo angayng palampasun mao ang paghangop sa gabon sa kabukiran. Ang kanindot sa palibot sa Tarago hills dili gayud masinati sa mga bisita kung wala kini ma-develop ug tarong sa tag-iya. “Actually this place is my unwinding place. Everytime na naa koy problema, muanhi ko diri para mag unwind. Kasi feeling nako I’m on the top of the world. Simply because I want them to experience and see the nature, the beauty the Lord has given to us", matud ni Edith Julian, tag iya sa The Haven’s Peak Mountain Resort. Ang mga bisita wala gayud napakyas sa ilang nakita dinhi tungod ang ilang ginapangita nga perfect getaway, nabati nila sa maong mountain resort. Ang Maragusan may ubay-ubay nga ikapasigarbong talan-awon nga ikadalit ngadto sa mga taong buot mag unwind karong summer. Sama na lamang sa ilang 30 ka waterfalls, usa na dinhi ang Tagbibinta falls nga nahimutang sa Barangay Coronobe. Ug dili lang kana, makita usab dinhi ang pinakadakong bulak sa kalibutan, ang Rafflesia mira. Ang maragusan usa sa mga lugar nga adunay talagsahong kaanyag. Dili lang kini usa ka suruyanan karong summer apan usa usab sa mga nindut nga obra gihatag sa labaw nga makagagahum kanato. Busa hinaut kini mapreserba ug tarong aron kini magpabiling gihapong "Summer Capital of Davao Region" ug "Valley of Springs and Waterfalls".