Glaiza de Castro and Rhian Ramos: The new TomDen?

Dahil sa epektibong pagganap niya bilang isang 'lipstick lesbian' sa GMA primetime series na The Rich Man’s Daughter, natatawang inamin ni Glaiza de Castro, “Ngayon, mas maraming nagpaparamdam na girls.”

Gumaganap si Glaiza sa teleserye bilang si Althea, na lesbian lover ni Rhian Ramos bilang si Jade naman.

Madalas sabihin ni Glaiza na wala pa siyang lovelife, kaya naiintriga at at napagdudadahan siyang tomboy.

Pero sabi nga niya sa PEP.ph (Philippine Entertainment Portal), “Kasi before naman, aware na yun mga guys… sabi nga nila, hard to get daw ako, e.

“Pero yun kasi ang paniniwala ko, ever since, na kung talagang seryoso ka, ipu-pursue ka nila.”

Kung may ka-close man daw siya ngayon, ito ay ang co-star niya rin sa The Rich Man's Daughter na si Chynna Ortaleza, na isa namang butch lesbian ang karakter bilang si Batchi.

In real life, close silang dalawa at pareho silang single ngayon. Hindi kaya sila maintriga?

“Imposible yun bilang si Chynna ay isang maharot na bata!” natatawang sabi ni Glaiza.

Dagdag niya, “Kikay yun in real life. Ganun lang din kasi siya ka-immerse sa role niya.

“Kaya nakikita talaga natin na totoo si Batchi, totoo siyang tao.”

LOVETEAM. Naging malapit din sila ni Marian Rivera, na orihinal sanang gaganap bilang si Jade. Pero dahil sa pagbubuntis nito, si Rhian ang pumalit kay Marian.

Kumusta na sila ni Rhian ngayon?

Lahad ni Glaiza, “Honestly, mas kumportable kami ngayon.

“Before kasi, nung nagkatrabaho kami [sa Stairway To Heaven], kontrabida niya ako.

“So, hindi kami nagkaroon ng ganitong project na we work with each other, especially sa mga scenes na mai-in love kami sa isa’t isa.
 
“So, nakakatuwa dahil after ilang years din yun, yung Stairway to Heaven, nagkatrabaho kami.
"Tapos makikita talaga namin kung paano kami nag-grow artistically.

“Personally, nakakatuwa na nagkaroon ulit kami ng chance na to work with each other.”

Dahil sa roles nila bilang lovers sa The Rich Man's Daughter, may na-coin na na pangalan ng tandem nina Glaiza at Rhian—RastroRebels.

Para silang sina Dennis Trillo at Tom Rodriguez na nabuo ang TomDen loveteam dahil sa primetime series na My Husband's Lover noong 2014.

Okey lang ba kay Glaiza na sila ni Rhian ang maging 'loveteam'?

Sagot niya, “Surprising talaga and never kong na-imagine na mangyayari ito.

“At interesting din kasi parang mahilig kasi ako sa mga offbeat na roles.

"Mga tipong kakaiba, so talagang dumidikit din siya sa 'kin.

“Tipong kakaibang loveteam, kakaibang story, kakaibang response din.

“So, nakakatuwa, dahil kumbaga masasabi mo sa sarili mo na, 'Uy, kaya ko pala yun... kaya pala namin yun.'”

Okey lang ba sa kanya na parang TomDen din ang mangyari sa kanila ni Rhian? Na kahit matagal nang tapos ang show at may kanya-kanya na silang shows, pero markado pa rin sa marami ang tambalan nila?

Ayon kay Gladys, “Nakapag-establish ang TomDen ng malaking following and, even up to now, marami pa rin ang sumusuporta talaga sa kanila.

“I can only say that it would be interesting that we represent another group of people instead of comparing us to them.

“So, ayun, gusto ko lang mai-represent sila nang maayos.

“Hopefully, kahit na matapos yung show, masuportahan pa rin nila kami sa mga endeavors namin.

"Kumbaga, magkaroon talaga kami ng solid na fans or supporters.

"Parang TomDen na until now, meron pa rin sila talagang solid supporters.” --  For the full story, visit PEP.