Princess Punzalan 'fulfilled' with nursing career in US

Isa si Princess Punzalan sa mga dumalo sa 6th Golden Screen TV awards na ginanap kagabi, Linggo, April 26, sa Carlos P. Romulo Auditorium, RCBC Plaza, Makati City.

Dumating si Princess para maging bahagi ng pagbibigay ng parangal na ipinangalan sa namayapa niyang inang si Helen Vela—ang Helen Vela Lifetime Achievement Award.

Iginawad ang award kina Roderick Paulate for Comedy, Ronaldo Valdez for Drama, at Cheche Lazaro for News Broadcast.

“Mabuting-mabuti po naman ako,” nangiting bungad ni Princess nang makausap ng PEP.ph (Philippine Entertainment Portal) at iba pang miyembro ng media.

Dagdag niya, “Registered nurse na ako sa Amerika, nagtatrabaho ako sa isang ospital doon.

“Nagbakasyon lang kami ng asawa ko rito para ipakilala sa mga kamag-anak ko yung anak ko.

“Magwa-one year na siya. Her name is Helie, parang Helen Vela.”

Hindi ba niya nami-miss ang showbiz?

Sagot ng mahusay na aktres, “Nami-miss din naman, bata pa ako, e, yun na talaga ang ginagawa ko.

“Kung iyon ang nakasanayan mong gawin at iyon talaga ang gusto kong gawin, hahanap-hanapin mo talaga.

“E, noong maliit pa ako, feeling ko… sabi ko, siguro magiging parang Mary Walter ako na hanggang sa pumuti na yung buhok ko ay mag-aartista pa rin.”

So, may plano pa rin siyang bumalik sa showbiz?

Tugon ni Princess, “Hindi ko naman talaga siya iniiwanan.

"Every time na bumabalik ako ng Pilipinas, naggi-guesting ako."

Halata naman sa aura ni Princess na masaya at kuntento siya sa kanyang personal life ngayon.

“Naman! Talagang-talaga,” nangiting pagsang-ayon niya.

Bukod sa pag-aartista, ang pagiging nurse ba talaga ang isa rin sa gusto niya?

Sabi ni Princess, “Actually, gusto kong maging doctor.

"Pero hindi ko kayang mag-aral ng twelve years! Baka puti na ang buhok ko bago ako mag-graduate.”

Ilang years na siyang nagpa-practice bilang isang registered nurse sa U.S.?

“Mga isang taon pa lang, bago pa lang.

"And masaya... masayang mahirap.

“Masarap yung alam mo na meron ka pang puwedeng ibang gawin.

“Masarap yung after twelve hours, at the end of your shift, meron kang natulungang mga tao para mas umige pa yung health.

“Minsan may mga tao na ni hindi marunong mag-English, pero alam mong hirap na hirap.  

“Hahawakan mo lang ang kamay, relieved na sila dahil may mga bagay na hindi nagagamot ng gamot lang.

“At the end of the day, you feel fulfilled knowing na meron kang natulungan.” -- PEP

For the full story, visit PEP.