Geoff Eigenmann breaks silence on breakup with Carla Abellana

Aminado ang Kapuso actor na si Geoff Eigenmann na may naging pagkukulang o pagkakamali rin siya kung kaya’t nauwi sa breakup ang relasyon nila ng aktres na si Carla Abellana.

Pahayag niya, “Alam ko naman na may mga pagkakamali rin ako. Hindi ko naman inaako na one-sided.

“Alam ko na may pagkakamali rin ako but I don’t think… things weren’t supposed to be that way.

“For me, lahat naman ng bagay, puwedeng pag-usapan nang maayos.

“Yun lang, all these times, I kept quiet about things.

“Now, nagsasalita ako, wala na. It’s all in the past.

“I’ve moved on and hindi na siya problema sa akin. It was never a burden on me, actually.”

April 2014 nang aminin ni Carla, sa panayam sa kanya ng StarTalk, na hiwalay na sila ni Geoff pagkatapos ng apat na taong relasyon bilang magkasintahan.

Nataon namang sunud-sunod ang mga proyekto ni Carla pagkatapos nito kaya hindi maiwasang mausisa siya ng media tungkol sa breakup nila ni Geoff sa mga press conference na kanyang dinadaluhan.

Sa kabilang banda, nanatiling tahimik si Geoff at kung ma-interview man ng press ay tikom ang bibig sa pagsasalita ng anuman tungkol kay Carla.

Ngunit sa Christmas party for the editors and select members of the press ng PPL Entertainment Inc.—na siyang nangangalaga sa career ni Geoff—ay naging bukas na ang 29-year-old actor sa paglalahad ng kanyang saloobin sa pagwawakas ng relasyon nila ni Carla.

Ginanap ang Christmas party, na dinaluhan din ng halos lahat ng PPL talents, sa Cities Events Place, Sgt. Esguerra, Quezon City, Huwebes ng gabi, December 4.
 
BREAKING HIS SILENCE. Tinanong ng press si Geoff kung bakit tila hindi maganda ang lumalabas na balita kaugnay ng breakup nila ni Carla.

Tugon niya, “I never said anything about anyone or whatever.

“So, kung anuman ang naririnig niyo, kanila na yun, hands-off ako dun.

“I can only be liable for what I say about myself and all that.

“So, I guess, I’m the wrong person to ask on why things unfolded that way.”

Ngunit sa kabila ng pananahimik niya ay marami pa ring bumabatikos sa kanya sa social media.
Ano ang reaksiyon ni Geoff dito? Naaapektuhan din ba siya ng bashers o haters?

Natatawang sabi niya, “Kung susundan niyo naman ang Instagram ko, kupal ako, e!

“Minsan may mga pinapatulan ako. Pinapatulan ko sila, e.”

Patuloy niya, “Mali, pero that’s the way I can defend myself.

“Kasi, okey lang naman kung tirahin mo ko about that, pero minsan, sumusobra na.

“Hindi naman sa naapektuhan, pero minsan kasi, umaabot na sa family, merong mga ganun, e.

“Umaabot sa trabaho, career-wise.

“Hindi naman totoo, may masabi lang sila.

“And these are people behind Instagram na hindi naman totoong account.

“Kung sinumang binabayaran lang sila to do that. It’s probably one person to say the same thing.

“Problema nila yun.

“Basta ako, I enjoyed for a while na pinatulan ko sila, but wala, tapos na yun.”
 
NOT OFFENDED. Inusisa naman ng PEP kay Geoff ang reaksiyon niya sa isang panayam kay Carla kung saan tila inihalintulad siya ng ex-girlfriend sa “demonyo.”

Tinanong kasi si Carla tungkol sa pagpapatawad at sagot ng aktres tungkol dito: “Kung si God nga kayang mag-forgive ng kahit sinong demonyo, ‘di ba? Sino ba tayo para mag-hold ng grudges?”

Natawang reaksiyon dito ni Geoff, “I think, whatever she said reflects more on her than on me.

“So, I’ve always been quiet. 

“Whatever she said, wala kayong narinig sa akin.”

Dagdag ng aktor, “Ako, I wasn’t really offended with her comments.

“She can say whatever she wants.

“Kung sa tingin niya ganun ako, then… she was with me for four years.”-- Rose Garcia, PEP
 
For the full story, visit PEP.