Wally Bayola admits that he considered committing suicide after sex video became viral

 
Sa pagpapatuloy na panayam ng PEP.ph (Philippine Entertainment Portal) kay Wally Bayola, inamin ng komedyante na pagkatapos kumalat ng kanyang sex video sa Internet ay pumasok sa isip niyang tapusin na lang ang kanyang buhay.

Basahin: Wally Bayola breaks his silence on sex video scandal

Saad ni Wally, “Nung nakita ko na lumabas na sa social media yun, hindi ko alam kung ano ang gagawin ko.

“Nagkulong ako sa kuwarto.

“Pumasok pa sa isip ko na tapusin ko na nga, e... yung gusto ko nang magbaril sa sarili.

"May baril ako sa bahay na nung time ay nilalaru-laro ko.

“Konting-konti na lang, puwede na siyang sumabog.

“Biglang nag-ring ang telepono, parang saved by the bell.

“Kasi after ng pag-uusap namin ng tumawag ay nakalimutan ko na ang binabalak kong pagpapakamatay.

"Ang ginawa ko," pagpapatuloy ni Wally, "tinawagan ko si Jose. Tinawagan ko rin yung ibang kasama ko sa Eat Bulaga!

“Pero hindi sila sumasagot. Siguro mga tulog na kasi madaling-araw na yun.

"Si Jose, hindi rin sumagot sa tawag ko, kaya nag-text ako sa kanya.

“Maya-maya, sumagot siya. Sabi ko, kausapin niya ako.

“Sabi niya, 'Kaya mo 'yan. Dumaan din ako sa matinding problema, nakaya ko. Kaya mo rin!’

"’Tapos sabi pa niya, 'Puntahan mo ang anak mo sa ospital. Puntahan mo siya ngayon. Pumunta ka ng ospital.'

"Pagkatapos naming mag-usap, punta agad ako sa anak ko.

“Paglapit ko sa anak ko, hindi pa ako nagsasalita, sabi niya, 'Ikaw kasi Papa, e.'

"Sabi niya, magdasal kami.

“Nag-lead siya ng prayer, kaming tatlo ng asawa ko, magkakahawak-kamay kami. 

“Habang nagdadsal kami, grabe ang iyak ko! Doon lang ako nakaiyak nang ganoon.

"Pero pagkatapos naming magdasal, gumaan ang pakiramdam ko."
 
TITO, VIC & JOEY. Ano ang reaksiyon ng main hosts ng Eat Bulaga! na sina Vic Sotto, Tito Sotto, at Joey de Leon? Nakausap ba niya ang tatlo tungkol sa kinasangkutan niyang eskandalo?

Sabi ni Wally, "Pinuntahan ko si Bossing [Vic] sa Eat Bulaga!, nag-sorry ako sa kanya.

“Sabi niya, 'Huwag kang mag-alala, makaka-recover ka rin... in five years!' Nagtawanan kami.

"Humingi rin ako ng sorry kina Mr. Tony Tuviera, sa mga taga-Eat Bulaga! Napatawad naman nila ako.

"Biniro naman ako ni Joey, 'Wala ka bang part two niyan?'

"Kay Tito Sen na lang ako hindi nakapag-sorry nang personal.”

Sabi pa ni Wally, "Nung lumabas ang video ko, naisip ko si Chito Miranda, yung singer.

Basahin: Chito Miranda's lessons from sex video incident

“Naintindihan ko yung naramdaman niya noong may lumabas din na video nila. Biktima siya, e.

“Bukod doon sa una, may sumunod pa sa kanya na video.

"Na-imagine ko kung gaano kagrabe yun. Kasi kami, mga biktima."

Gaya ni Wally ay may kumalat ding sex video si Chito kasama ang girlfriend nitong si Neri Naig.

Saad pa ni Wally, "Kaya nga sa mga nagse-selfie sa phone, sa iPad o iba pang gadget, huwag nang maglagay ng masyadong personal sa kanila.

“Kasi, kahit ma-delete mo 'yan, mare-retrive pa rin, e.

“Kahit nga yung password o code sa ATM, minsan nilalagay natin sa phone.

“Huwag na nating gawin yun, kasi nakukuha nila kapag may ipinagawa tayo sa gadget natin.”
 
WALLY’S WIFE. Thankful naman si Wally sa sobrang pagmamahal at pang-unawang ibinigay sa kanya ng pamilya niya, lalo na ang kanyang misis na si Liza.

Sabi niya, "Napakabait ng asawa ko.

“Alam niya from the start kung ano meron kami ni Yosh. Pero nandiyan siya.

“Minsan pa nga, magkasama sila, nagkikita sila, nagkakausap sila."

Ipinakilala pa nga  ni Wally sa amin ang kanyang misis at anak na may sakit sa lobby ng Zirkoh Comedy Bar kagabi.

Ayon sa komedyante, "Pinapunta ko sila rito para makilala ng anak ko yung mga tumulong at tumutulong sa pagpapagamot niya.

“At para personal din siyang makita nung tumutulong sa kanya.”

Kinunan ng PEP ng pahayag ang misis ni Wally tungkol sa matinding pagsubok na pinagdaanan nila.

Sabi ni Liza, "Nag-stay put ako sa kanya kasi para makita rin ng mga anak namin what marriage is all about, and we stick with each other as a family, no matter what happens.”

Ano ang pakiramdam ni Wally ngayong nakabalik na ulit siya sa Eat Bulaga?

Sagot niya, “Magaan na, nakaka-recover na rin. Pero nagpapa-counseling din ako.

“Salamat… salamat sa mga taong tumulong sa akin, lalung-lalo na sa Eat Bulaga.” -- Julie E. Bonifacio, PEP