Starstruck The Final Judgment reunites past survivors, avengers

Hindi lamang ang mga kalahok ng Starstruck Season 6 ang nagsama-sama sa naganap na The Final Judgement night nitong Sabado, December 19, upang maging bahagi ng pag-aanunsyo ng pinakabagong Ultimate Male and Female survivors ng nasabing Kapuso reality-based artista search.

Kabilang sa mga nagbalik sa Starstruck stage ang Season 1 Ultimate Male Survivor na si Mark Herras, kasama ang Season  1 Ultimate Female Survivor at Season 6 judge na si Jennylyn Mercado.

Kasama rin sa tila Starstruck reunion na ito ang isa sa Season 4 Ultimate Loveteam at Season 6 host na si Kris Bernal at ang Season 4 Ultimate Hunk na si Aljur Abrenica.

Naroon din ang mga dating Starstruck Avengers na sina Rainier Castillo, Dion Ignacio, Enzo Pineda, at Alden Richards.

Itinanghal na  Ultimate Male and Female Survivor ng reality-based artista search na Starstruck Season 6 sina Migo Adecer at Klea Pineda, habang First Prince at Princess naman sina Elyson de Dios at Ayra Mariano.

Kabilang na sina Migo at Klea sa hanay ng mga nagwagi sa Kapuso reality-based artista search sa loob ng maraming taon, tulad na lamang nina Mark Herras at Jennylyn Mercado (Season 1);  Mike Tan  at Ryza Cenon (Season 2);  Jackie Rice at ang namayapang si Marky Cielo (Season 3);  Aljur Abrenica at Jewel Mische (Season 4); at Steven Silva at  Sarah Lahbati (Season 5). —Bianca Rose Dabu/AT, GMA News