GALLERY: Photos that show why Jennylyn Mercado is FHM’s sexiest

Nitong Linggo lamang nang pormal na ipakilala ng men's magazine na FHM ang Kapuso actress at PEP List 2015 Teleserye Actress of the Year na si Jennylyn Mercado bilang Sexiest Woman in the Philippines matapos ang naganap na botohan para sa FHM 100 Sexiest ngayong taon.

Bago pa mapunta sa No. 1 spot ng 100 Sexiest list, pinatunayan na ni Jennylyn na isa siya sa mga showbiz personalities na mayroong pinakamagandang pangangatawan dahil na rin sa sunod-sunod na sexy pictorials at runway features.

Tampok ang aktres sa calendar ng Tanduay Rhum ngayong taon, kasunod ng Kapuso actress na si Heart Evangelista.

Ayon kay Jen, tamang pagkain at ehersisyo lamang ang kanyang sikreto para ma-achieve ma-maintain ang kanyang sexy at fit na pangangatawan kahit na isa na siyang mommy sa six-year-old na si Alex Jazz.

Kabilang sa workout at fitness routine ni Jen ang running, swimming, at biking, at napapadalas na rin ang training at pagsali niya sa mga marathon, duathlon, at triathlons.

Sinisiguro rin ng aktres na healthy at tama ang kanyang pagkain, kaya naman nitong nakaraang buwan lamang ay nag-enroll siya sa isang culinary school upang mahasa ang kakayahang magluto at upang mapaghandaan rin ng masasarap at balanced meals ang kanyang anak. -Bianca Rose Dabu/NB, GMA News