Ano kaya ang birthday wish ng batang 'Yagit' star na si Chlaui Malayao?

 
Ngayong January 24 ipagdiriwang ni Yagit star Chlaui Malayao ang kanyang 7th birthday. Ayon sa child star, pinaghahandaan na raw ng kanyang Mommy ang selebrasyon.

“Magbi-birthday po ako sa Cavite,” pahayag ni Chlaui.

Kuwento ni Chlaui, imbitado raw ang cast ng Afternoon Prime soap sa kanyang handaan na gaganapin sa February 1. Aniya, “Sina Ate Judie po, 'yung mga bida sa Yagit tapos sina Kuya Paolo Contis, Kuya Mark [Herras] at Kuya Wowie [de Guzman].”

Ano ba ang gustong matanggap na regalo ni Chlaui sa kanyang kaarawan? “Sana [ay] marami pong magbigay sa 'kin ng mga damit,” sagot ng child star.

Dagdag pa niya, “Saka sana po, lagi pa rin po nilang panoorin 'yung Yagit para po tumaas 'yung ratings namin.”

Bukod pa sa mga ito, mayroon pa raw inaasahang regalo si Chlaui mula sa kanyang mga magulang. “Sabi po kasi nila sa 'kin, yung gift daw po nila sa 'kin [ay] kotse. Pero raw hindi pa raw sure 'yon,” anang Yagit child star.

Pero ani Chlaui, kahit daw hindi siya maregaluhan ng kotse ay okay lang. Ang importante raw ay kumpleto silang pamilya sa birthday niya. “Kahit anong gift na lang po at least po, mahal po ako ng Mommy at Daddy ko,” pagtatapos niya.

Nagbahagi naman ang co-stars ni Chlaui na sina LJ Reyes at Yasmien Kurdi ng kanilang birthday wish para sa child star.

“Sana huwag siyang mapapagod na mag-improve [sa acting] and sana huwag niya rin pababayaan 'yung pag-aaral niya. Wish ko na sana lumaki siya as a beautiful girl,” bahagi ni LJ.

Saad naman ni Yasmien, “Wish ko sa kanya na sana [ay] magpakabait pa siya at huwag lalaki ang ulo. And always do your best and enjoy what you're doing kasi bata ka pa.” - Al Kendrick Noguera, GMANetwork.com