Direk Carlo J. Caparas, ipinapaaresto dahil sa tax evasion case

Iniutos ng Court of Tax Appeals (CTA) nitong Martes ang pagdakip sa direktor na si Carlo J. Caparas matapos makita na may basehan para litisin siya sa kinakaharap na reklamong two counts ng tax evasion.

“After personally examining and evaluating the Information, the documents attached thereto and the records of preliminary investigation, the Court finds probable cause for the issuance of a warrant of arrest against the accused,” saad sa ipinalabas na resolusyon ng CTA Second Division.

Ang dalawang arrest order at pirmado nina Associate Justices Juanito C. Castañeda Jr., Caesar A. Casanova at Amelia R. Cotangco-Manalastas.

Nagtakda ang korte ng tig-P20,000.00 bilang piyansa sa bawat kaso o kabuuang P40,000.00.

Ang reklamo laban kay Caparas ay inihain ng Department of Justice noong nakaraang buwan dahil sa paglabag umano ng direktor sa Section 255 ng National Internal Revenue Code (NIRC) bunga ng kabiguang maghain ng kaniyang income tax returns (ITRs) mula sa taong 2008 at 2009.

Nahaharap din si Caparas sa iba pang tax evasion case na nakabinbin sa ibang debisyon ng CTA dahil din sa umano'y kabiguan nito na magsumite ng kaniyang value added tax returns para sa taong 2006 hanggang 2009. -- FRJ, GMA News