Maine kay Alden: 'Sa dinami-dami ng tao sa mundo, tayo ang pinagtagpo'

Sinorpresa ni Maine "Yaya Dub" Mendoza si Alden Richards na nagdiwang ng kaniyang kaarawan sa pamamagitan ng pag-awit ng "live" sa Eat Bulaga ng "Close I Get To You."

Sa simula ng kalyeserye nitong Sabado, hindi kaagad nakitang kasama nina Lola Nidora at Tidora si Maine  na sinabing umalis para bumili ng regalo kay Alden.

Nang makausap ni Nidora si Maine sa telepono, sinabi nito na magkita na lang sila sa studio para sa birthday celebration ni Alden.

Oh my gosh #ALDUBHappyBAEdayALDEN @officialaldub16 @EatBulaga pic.twitter.com/zDzXgXfRBA

— mary jul p. kajihara (@mjkajihara) January 2, 2016

Sa studio, doon na nakita ni Alden si Maine na umawit nang live ng "Closer I Get to You" ni Roberta Flack.

Matapos ang pagkanta, inihayag ni Maine ang kaniyang seryosong mensahe kay Alden.

"Isang karangalan na makilala kita at maging parte ng buhay ng isang Alden Richards.

"Alam mo yung pangarap mo, pangarap ko, pangarap nating dalawa, sabay nating binubuo.

"Isipin mo, sa dinami-dami ng  tao sa buong mundo, dito na lang sa Pilipinas;  sa dinami-dami ng tao sa Pilipinas, tayong dalawa pa ang pinagtagpo ng Diyos," bahagi ng mensahe ni Maine.

Patuloy ng dalaga, "Pinagtagpo tayo para tuparin yung pangarap nating dalawa."

Ayon kay Maine, masaya siya na masaya ang binata sa nakamit nitong tagumpay.

"Masaya ka kasi sa dinami-dami ng pagsubok na dinaanan mo, sa dinami-dami ng sakripisyo na ginawa mo para sa mga taong mahal mo sa buhay, eto na, eto na yung pinakahihintay mo.

"Lahat na nang hinihintay mo, eto na, nasa harap na natin.

"Sa sobrang dami ng blessings, ako, sobrang happy ko talaga for you.

Ayon pa kay Maine, "Ang maganda kasi sa'yo, hindi mo nakakalimutanng lumingon kung saan ka nanggaling.  Kaya 'yan simula Laguna, Laguna boy, yung kasikatan mo umabot na sa iba't ibang parte ng mundo."

Sabi pa ng dalaga, "Kahit anong mangyari lagi mong tatandaan na nandito lang ako for you, as ka-love team mo at siyempre bilang kaibigan. Basta God gave me you."

Matapos ang naturang mensahe, humiling at sumigaw ng "kiss" ang mga tao.

Pero humingi muna ng permiso si Alden kay Lola Nidora para ma-kiss niya si Maine.
Bilang pagrespeto, sa kamay hinalikan ni Alden si Maine. -- FRJ, GMA News