Marian Rivera emosyonal na nagpaalam sa 'Sunday Pinasaya'

Nagkaroon ng sorpresang baby shower para kay Kapuso Primetime Queen Marian Rivera nitong Linggo sa pangunguna ng kaniyang mga kaibigan at katrabaho sa weekly comedy show na “Sunday Pinasaya.”

 

Kasabay ng kaniyang segment na “Judge MD,” lumabas ang bawat tauhan sa naturang show upang magbigay ng mensahe para sa Kapuso actress, na pansamantalang mawawala sa programa upang paghandaan ang nalalapit niyang panganganak.

 

Walong buwan nang buntis si Marian at nakatakda na ngang makilala ng buong mundo ang panganay nila ni Kapuso Primetiem King Dingdong Dantes na si Maria Letizia bago matapos ang taon.

 

Sa sorpresang baby shower, hiniling ng kaniyang “Sunday Pinasaya” family ang kaligtasan niya at ng kaniyang anak.

 

“Ingat ka lang at alam ko ‘yung inaanak ko, lalabas ‘yan na maganda. Kamukhang kamukha ko. Always remember kambal, napakasarap maging nanay. It’s a very noble career to be a mother. Mami-miss ka namin kambal. Lalo na ako, wala na ako ka-chismisan," ayon kay Comedy Concert Queen AiAi Delas Alas, na malapit na kaibigan ni Marian.

 

“Isa kaming pamilya, talagang ‘yung closeness [namin iba]. Siya po talaga ‘yung promotor ng mga pagkain. Sobrang sweet po itong taong ‘to. Alam kong magiging sweet na nanay po ito,” dugtong naman ni “Eat Bulaga” Dabarkads Jose Manalo.

 

Hindi naman napigilan ni Marian ang maging emosyonal lalo na't napalapit na ang kaniyang loob sa lahat ng bumubuo ng programa.

 

“Sobrang mami-miss ko ‘tong Sunday PinaSaya kasi sobrang nag-e-enjoy ako. Kahit si Dong, ayaw na niya akong payagan kasi 37 weeks na ako. Sobrang mami-miss ko kayo. Babalik ulit si Judge MD. Thank you sa Sunday PinaSaya family ko and syempre sa fans na nadiyan, thank you,” ani Marian.

 

Mayroon naman daw nakatakdang pumalit sa kaniya sa sandaling panahon na mawawala siya sa “Sunday Pinasaya.”

 

“May isa lang akong pinayagang pwedeng pumalit sa akin sa ‘Judge MD’ kaya abangan ninyo ‘yan,” ayon kay Marian. —ALG, GMA News