Alden Richards, nagpakilig sa dinaluhang beauty pageant sa Albay

Damang-dama sa Albay ang "AlDub" fever dahil sa mainit na pagtanggap ng mga mamamayan ng Jovellar sa "Pambansang Bae" na si Alden Richards.

Sa "Chika Minute" report ni Nelson Canlas sa GMA News 24 Oras nitong Huwebes, sinabing hindi magkamayaw ang mga taga-Jovellar nang makisaya sa Quipia Festival si Alden nitong Miyerkules ng gabi.



Bukod sa pagharana sa mga kalahok sa kanilang local beauty pageant, nakipag-selfie rin si Alden sa mga tao.

Lalong nagpadagundong sa lugar ang ginawang pabebe wave ni Alden.

Labis naman ang pasasalamat ng Kapuso star sa mainit na pagtanggap sa kaniya ng mga tao.

Nangako rin si Alden sa AlDub nation ng Bicol na gagawin niya ang lahat ng challenges sa kaniya ni Lola Nidora para kay Yaya Dub. -- FRJ, GMA News