Birthday wish ni Ryzza Mae na magkaroon ng teleserye, natupad

Natupad ang birthday wish ni Ryzza Mae Dizon sa selebrasyon ng kaniyang ika-10 kaarawan na magkaroon ng sariling teleserye. Alamin kung sino ang makakasama niya rito.

Sa selebrasyon ng kaarawan ni Ryzza na ginawa sa kaniyang television show sa GMA 7 nitong Biyernes, dumagsa ang kaniyang mga bisita mula sa isa pa niyang programa na Eat Bulaga.

Present din sa special episode ng The Ryzza Mae Show ang kaniyang mga kapatid pati na ang bunsong si baby Ken.



Nandoon din ang EB dabarkads na sina Sen. Tito Sotto, Joey de Leon, Wally Bayola, Jose Manalo, Paolo Ballesteros, Ruby Rodriguez, Allan K, Pia Guanio. Pauleen Luna at iba pa.

May espesyal din siyang number kasama ang idolong si Aiza Seguerra.

Ayon kay Ryzza, bukod sa magandang kalusugan para sa kaniya at sa mga mahal sa buhay, nais din niyang magkaroon ng sariling teleserye.

Kaagad naman itong tinupad ng kaniyang dabarkads nang iregalo sa kaniya ang isang lalagyan na may lamang script ng pagbibidahan niyang teleserye.

Kasama rin sa lalagyan ang schedule ng kaniyang workshop at gagawing taping. Mayroon na ring upuan na ipinagawa para sa kaniya.

Ang makakasama raw ni Ryzza sa naturang teleserye, ang kaniyang idolo na si Aiza.

At kahit na magkaroon ng teleserye, hindi pa rin umano mawawala ang The Ryzza Mae Show, ayon kay Sen. Tito. -- FRJ, GMA News