'Bigyan Ng Jacket 'Yan!,' segment sa game show ni Willie Revillame na Wowowin!

Muling mamimigay ng jacket si Willie Revillame sa kaniyang bagong variety-game show na Wowowin na mapapanood sa GMA-7. Pero sa pagkakataon ito, may malaking pa-premyo nang kasama kapag narinig ang katagang, "bigyan ng jacket 'yan!"

Nitong Biyernes, pormal nang pumirma ng kontrata si Willie para sa kaniyang pagbabalik sa telebisyon matapos ang may isang taong pamamahinga.

Ayon kay Willie, magiging segment ng game show ang "Bigyan Ng Jacket 'Yan."



"Sa sampung jacket na 'yon, meron hong nakalagay du'ng cash o kung ano man. Pero merong isang susi du'n, yung susi na 'yon, 'pag umandar yung sasakyan, iuuwi mo na 'yon," paliwanag niya.

Bukod sa sasakyan, asahan na raw ang pamimigay ng papremyong cash at maging bahay at lupa.

"Magbibigay kami ulit siyempre ng one million, magbibigay ulit kami ng sasakyan, house and lot. Kumpleto na, kumpletong-kumpleto na para sa isang buong pamilya," masaya niyang balita.

Ayon kay Willie, sabik na rin siya sa pagbabalik gameshow para makatulong sa mga kababayan na naghihintay sa kaniyang pagbabalik.

"Yung excitement not for me eh, du'n sa mga tao, especially 'yung mga kababayan natin na na-miss ko. Sa araw-araw mong ginagawa 'yon for nine years, eto babalik ka para sa kanila," pahayag niya.

Itinuturing ni Willie na pagbabalik ang ginawa niyang pagpirma ng kontrata sa GMA Network dahil dito umano siya nagsimula nang maging miyembro ng "Hawi Boys" ni Randy Santiago sa dating noontime show na "Lunch Date" noong 1980's.

Hindi pa batid kung sino ang makakasama ni Willie sa programa pero si Randy ang magiging direktor nito.

Ka-partner ng GMA ang production company ni Willie na WBR Entertainment  sa Wowowin na mapapanood tuwing Linggo, na inaasahang mapapanood sa Abril. -- FRJimenez, GMA News