Aktres na si Jan Marini, nabiktima ng ‘riding in tandem’

Nabiktima ng snatching ang aktres na si Jan Marini sa Sacred Heart, Quezon City nitong hapon ng Sabado, ayon sa ulat ng GMA news 24 Oras Weekend. Nagtungo mismo si Jan sa himpilan ng pulisya para ipaalam ang pangyayari. Kwento ng aktres, kasama ang kanyang mister at anak, papunta na umano sila sa sasakyan nang hablutin ng mga suspek na nakasakay sa motorsiklo ang kanyang shoulder bag. Sinabi sa ulat na may lamang cash ang bag na nagkakahalaga ng P15,000, ilang cellphone, ATM card at susi umano ng kanilang bahay. Hinabol pa umano ng aktres ang mga suspek pero hindi na nila inabutan. Nagsasagawa naman ng follow operation ang pulisya para mahuli ang mga suspek. - FRJimenez, GMA News