Jennifer Lopez, posible raw pumunta sa Pilipinas

Sa isang press conference sa Los Angeles, inihayag ng Hollywood singer-actress na si Jennifer Lopez ang posibilidad na pumunta siya sa Pilipinas para sa concert tour. Sa Chika Minute ng GMA news 24 Oras nitong Martes, sinabing ginawa ang press conference ni Jennifer para ipaalam ang gagawin nilang concert tour sa US kasama ang Latino heartthrob-singer na si Enrique Iglesias. Mula sa audience, may nagtanong kung posibleng dalhin ang concert tour sa Pilipinas lalo pa’t may dugong Pinoy si Enrique. “Yes, my mom," mabilis na sagot ng Latino heartthrob patungkol sa kanyang ina na si Isabel Preysler. Ayon naman kay Jennifer, ang plano sa ngayon ay iikot ang concert nila ni Enrique sa US at hindi umano imposibleng dalhin din ito sa Pilipinas kapag isinagawa na ang international tour. “We’re talking about doing international later in the year and… it’s very possible, it’s possible," pahayag ng American Idol judge na nagpahayag na marami siyang nakikitang Pinoy fans sa Twitter. “I see them on Twitter, all the Filipino fans so yes, I would love to go there," masayang pahayag pa ni Jennifer. - FRJimenez, GMA News