'Pictorial Scandal' ni Jackie Rice sa Wish Ko Lang! ngayong Sabado

Mabilis na pinag-usapan sa social media ang video ng Kapuso actress na si Jackie Rice na mistulang nagtaas ng boses sa isang nakatatandang tagahanga. Nasa pictorial sa isang pampublikong lugar noon si Jackie nang makita siya ng nasabing fan na gustong-gusto siyang malapitan at makilala.

Sa sobrang kasabikan at tuwa, hindi na naisip ng fan na baka abala ang artista. Paano pa kaya kung masundan pa ito ng iba’t-ibang aberya na uubos sa pasensiya ni Jackie? Sa kaniyang inis, mistulang papatulan na niya ang tagahanga, na siya namang makakatawag pansin sa nakararami.

Pero bago mag-react, ang tagpong ito ay isa lamang social experiment na nilatag ng Wish Ko Lang! Ano kaya ang gagawin ng mga makakasaksi nito, kuhanan sa cellphone ang galit na artista at i-upload sa social media? O pumagitna at ayusin ang problema?

Tampok din sa Wish Ko Lang! ang pagtulong ni Asia’s Songbird Regine Velasquez-Alcasid sa ngayo’y may sakit na si Eva Castillo na kilala rin bilang ang “babaeng nakatalo kay Regine Velasquez.”

Abangan ang lahat ng ito sa Wish Ko Lang! kasama si Vicky Morales ngayong Sabado ng hapon pagkatapos ng Tales of Horror sa GMA-7.