Kaso ng babae na pinatay at isinilid sa sako, sisiyasatin sa 'Imbestigador'

 

“BABAE SA SAKO”
July 2, 2016

Siya si “Gemma”, di niya tunay na pangalan. Umibig sa dalawang lalaking matalik na magkaibigan. At ang pag-ibig na ito ang magdadala sa kanyang kapahamakan.

Dalawang taon na ang nakararaan, nagimbal ang mga residente ng Barangay Libertad sa Tayug, Pangasinan.

Matapos ang dalawang buwang pagkawala, muling natagpuan si “Gemma”. Pero isa na siyang malamig na bangkay. Nakasilid sa sako at nakabaon sa loob ng isang bahay. Sa isinigawang imbestigasyon ng pulisya, lumabas na isa itong kaso ng “crime of passion”. Hindi ordinaryo ang buhay pag-ibig ni “Gemma”. May kinasama siya pero may namuo rin siyang ugnayan sa malapit na kaibigan ng kasintahan.

Sino ang pumaslang sa bente tres anyos na si “Gemma”? Paano nauwi sa malagim na katapusan ang kuwento ng kanyang buhay pag-ibig?

‘Wag palampasin ang Imbestigador ngayong Sabado ng hapon, July 2 sa GMA!