Brutal na pagpatay sa isang dalagita sa Calamba, sisiyasatin sa 'Imbestigador'

Rasha Mae
April 23, 2016
Sa pagganap nina Barbara Miguel, Sharmaine Arnaiz at Mon Confiado

Naglahong parang bula ang onse anyos na batang si Rasha Mae. Puspusan siyang hinanap ng kanyang mga magulang. Sinuyod anbg bawat lugar na maaaring puntahan ng bata. Pero bigo silang matagpuan ang anak.

Sa gitna ng kanilang paghahanap, isang saksi ang lumutang, siya ay isang batang hindi nakakapagsalita pero pilit niyang isinenyas ang kanyang mga nakita. Sa kanyang pahiwatig, nakita raw niyang kasama ni Rasha Mae ang isang lalaki. Nakahubad ang lalaki, hawak ang kamay ni Rasha Mae at pumasok sa isang bahay. Pero hindi pinansin noong una ang mga pilit sinabi ng batang saksi.

Dalawang araw ang nakaraan, isang bangkay ang natagpuan sa damuhan. Duguan, puno ng saksak sa katawan at wala nang buhay.

Siya na nga kaya ang nawawalang si Rasha Mae? Paano nakatulong sa paglutas sa kasong ito ang batang hindi nakakapagsalita? Ano nga ba ang sinapit ng batang si Rasha Mae?

Sundan ang buong kuwento sa Imbestigador ngayong Sabado, April 23 pagkatapos ng Celebri-TV sa GMA-7!