Kaso ng pagpatay kay 'Princess', sisiyasatin ng 'Imbestigador'

Princess sa Imbestigador
Sabado, Enero 17

pagkatapos ng Startalk at bago ang 24 Oras Weekend

 

Bunsong anak si Princess, limang taong gulang. Masipag, masiyahin, bibo. Nagsisilbing inspirasyon at nagbibigay saya ang bata sa pamilya Gravino.  Pero bago mag-Pasko, naglahong parang bula si Princess. Ika-dalawampu’t tatlo noong Disyembre, napansin ng ina na nawawala si Princess. Inakala nilang sumama lang ang paslit sa kapitbahay para mangaroling. Pero lumipas ang gabi, hindi na umuwi si Princess.



Halos dalawang linggo mula nang mawala ang bata, isang siyam na taong gulang na bata naman ang tinangkaang dukutin sa kalapit na lugar nina Princess. Nadakip ang suspek sa tangkang pagdukot. At ikinagulat ng mga kaanak ng nawawalang si Princess nang aminin ng suspek na siya rin ang tumangay kay Princess. Ayon sa kaniya, buhay pa si Princess nang ipagkatiwala niya sa ibang tao. Pero dalawang araw matapos ang pagkakadakip ng itinuturong salarin, natagpuan ang bangkay ng nawawalang bata.

 

Sa pagkakatagpo ng kanyang bangkay, hindi naging malinaw sa mga otoridad ang sanhi ng pagkamatay ng biktima. Hanggang isang pangalan pa ang ikinanta ng nahuling suspek. Mahuli pa kaya ang isa pang sinasabing maysala at mabigyang linaw ang sinapit ng batang si Princess sa kamay ng mga dumukot at pumatay sa kaniya?

 

Huwag palampasin ang Imbestigador ngayong Sabado ng hapon, January 17, pagkatapos ng Startalk at bago ang 24 Oras Weekend.