Mga batas na nangangalaga sa kapakanan ng mga hayop

Marami ang nanggalaiti at nagalit nang kamakailan ay muling kumalat sa internet ang isang “crush video,” kung saan walang-awang tinapak-tapakan at nilamog ang katawan ng isang tuta  hanggang sa ito'y mamatay. 

 

Sa Pilipinas, itinuturing na bahagi ng pamilya ang mga alagang hayop, kaya naman maigting ang panawagan ng taumbayan para maparusahan ang mga nasa likod nito.

 

Taong 2011 nang madakip ang itinuturong mastermind sa paggawa ng crush videos sa bansa. Kasalukuyan pa ring nakakulong ang mag-asawang Victor at Dorma Ridon na mga suspek sa likod ng production ng crush videos mula sa kanilang bahay sa La Union.

 

Anu-anong kaso nga ba ang maaaring harapin ng mga taong mahuhuling nananakit ng mga hayop? Ito ang mga batas sa Pilipinas ang nangangalaga sa kapakanan ng mga hayop.

 

Republic Act No. 8485

AN ACT TO PROMOTE ANIMAL WELFARE IN THE PHILIPPINES, OTHERWISE KNOWN AS “THE ANIMAL WELFARE ACT OF 1998”

Taon ng Pagsasabatas: 1998, pirmado ni Pangulong Fidel V. Ramos

 

Ang RA 8485, na mas kilala bilang Animal Welfare Act, ang unang batas na komprehensibong nagtadhana sa tama at makataong pangangalaga ng mga mamamayan sa lahat ng hayop sa Pilipinas. Binuo ng batas na ito ang Committee on Animal Welfare na siyang mamumuno sa pagpapatupad ng batas.

 

Sinasabi ng batas na dapat mabigyan ang lahat ng hayop ng wastong pangangalaga, at maaaring maparusahan ang sinumang mapatunayang lumalabag dito.

 

Sa Sec. 6 ng batas, ipinagbabawal ang pagmaltrato at pag-torture sa mga hayop. Ipinasa rin sa bahaging ito ng batas na hindi maaaring pumatay ng hayop, maliban sa mga hayop na kinakain tulad ng baka, baboy, kambing, tupa, manok at iba pang poultry, kuneho, kalabaw, kabayo, usa at buwaya. 

 

Isang paglabag sa batas ang pagpatay sa mga hayop na hindi nabanggit liban na lamang kung ito ay dahil sa ritwal ng isang relihiyon, malubhang sakit ng hayop, at animal control kung saan nasa bingit ng panganib ang hayop o mga taong malapit dito.

 

Itinuturing na isang landmark law ang Animal Welfare Act dahil ito ang unang kumilala ng kalupitan sa hayop bilang isang paglabag sa batas.

 

Republic Act No. 10631

AN ACT AMENDING CERTAIN SECTIONS OF REPUBLIC ACT NO. 8485, OTHERWISE KNOWN AS “THE ANIMAL WELFARE ACT OF 1998"

Taon ng Pagsasabatas: 2013, pirmado ni Pangulong Benigno S. Aquino

 

Pinirmahan kamakailan ni Pangulong Noynoy Aquino ang RA 10631 upang paigtingin ang kasalukuyang batas na umiiral kaugnay ng animal welfare. 

 

Ilan sa mga amyenda o pagbabagong itinadhana ng RA 10631 ay ang mas mataas na piyansa o parusa kapag napatunayan ang paglabag sa Animal Welfare Act. Itinaas ng RA 10631 ang multa sa paglabag ng batas; mula sa dating P1,000 hanggang P5,000, ginawa itong P50,000 hanggang P100,000. Ihinawalay rin nito ang mga parusa sa bawat opensa at idinagdag bilang paglabag sa batas ang sinumang mapatunayang pinabayaan ang hayop na nasa kanyang pangangalaga.

 

Panukalang Batas: House Bill 914

AN ACT TO PROHIBIT ANIMAL CRUSH VIDEO, AND PROVIDING PENALTIES FOR VIOLATIONS THEREOF

Taon ng Panukala: 2013

May-akda: Rep. Irwin Tieng

Progreso: Committee Level

 

Ang panukalang ito ang unang hayagang pagbabawal sa paggawa ng mga crush video at ang pamamahagi nito sa anumang medium na maaring gamitin. 

 

Nakasaad sa panukala na ang magiging parusa sa paglabag nito ay pagkakakulong ng tatlo hanggang pitong taon ,o kaya ay piyansang mula P100,000 hanggang P300,000.

 

Nasa Mababang Kapulungan pa ang panukala sa kasalukuyan.— Irvin Cortez/CM, GMA News