Dalawang kuwento ng extraordinary love, magpapakilig sa 'Wagas'

Ngayong Sabado tampok ang dalawang mukha ng ekstraordinaryong pag-ibig sa WAGAS --- Ang kwento ngisang babaeng may kakambal daw na ahas pero nakahanap ng tunay na magmamahal sa kanya  at isang nilalang na may pinagdaraanang hiwaga ngunit mas pinanaig ang wagas na pag-ibig.



Nang ipanganak si Conchita (KATRINA HALILI), sunod na lumabas daw sa sinapupunan ng kanyang ina ay isang ahas. Pinaniniwalaang kakambal niya raw ito. Kahit pa ubod ng ganda si Conchita,  walang lalaking nagtangkang manligaw sa kanya dahil batid ng marami ang tunay niyang katauhan.  Pero iba si Simplecio (MARCO ALCARAZ).

Sa gitna ng reputasyon ni Conchita, at hindi alintana ang mga ahas na namumugad sa bahay niya… umakyat ng ligaw at minahal niya ang dalaga. Sa kabila ng misteryo at panganib na bumabalot sa katauhan ng asawa, tinanggap ni Simplecio ng buong buo si Conchita. Ipinamalas niya sa kanya ang wagas na pagmamahal na walang panghuhusga.

Sa pangalawang kwento, maaring isipin ng marami na tila imahinasyon lamang ang lahat pero sa panayam ng Wagas kay Dolores (KRIS BERNAL) buo at detalyado ang kwento na tila ba kahapon lamang nangyari ang lahat.

Kwento ni Dolores, may pambihirang kakayahang manggamot ang kanyang lola noon na ipinamana raw ng mga  kung tawagin  ay ‘taong lupa’. Nang mamatay ang kanilang lola, ipinapamana ang kapangyarihan kay Dolores. Pero tinanggihan  niya ito.

Upang takasan ang lahat, lumuwas ng Maynila si Dolores at namasukan bilang kasambahay. Dito niya nakilala si Fernando.

Sa kabila ng kakaibang mga nakikita at nararamdaman ni Dolores, inunawa at inintindi siya ni Fernando.  Ngunit sadyang malakas daw ang kapangyarihan ng mga hindi maipaliwanag na nilalang hanggang sa nais na nilang sirain si Dolores dahil sa pagtanggi nito sa sumpa. Ang hindi niya alam,  bilang kapalit..  isinasakripisyo ni Fernando ang sarili nitong buhay makawala lamang siya sa sumpa.

Dalawang kwento ng pag-ibig na kakaiba at puno ng hiwaga ang handog ng Wagas ngayong Sabado 7pm sa GMANEWSTV!