Mister na ginayuma ng kumare, mapapanood sa 'Wagas'

PAANO KUNG KAAGAW  MO SA ASAWA MO AY SI  KUMARE?

Naging kumare at kapitbahay si Luzia (MEG IMPERIAL) ng mag-asawang sina Vir (MARCO ALCARAZ) at Den (LOVELY ABELLA) pero hindi nila sukat akalaing ang kaibigan at ninang pa ng anak nila ang magdudulot ng sari-saring kababalaghan at kalbaryo sa kanilang pagsasama.

Balo si Luzia at mag-isang binubuhay ang kanyang anak kaya gayon na lamang ang inggit niya sa masayang pamilya nina Vir at Den. Ginawa niya ang lahat para agawin ang asawa ni  Den. May alam sa panggagayuma si Luzia kaya dinaan niya sa Gayuma si Kumpare.



Panyo, sulat at kung anu-anong orasyon ang ginawa ni Luzia para mahulog ang loob ni Vir sa kanya. Habang nasa ibang bansa ang lalaki, pinapadalhan ni Luzia ng mga sulat na may gayuma ang lalaki. Nang lumaon, tila nahulog na sa bitag  ni Luzia si Vir at pag-uwi niya sa Pilipinas kay Kumare na siya dapat uuwi imbes na kay Misis.

Pero mas malakas ang kapangyarihan ng Wagas na Pag-ibig, nalaman ni Den ang lahat at napigilan si Luzia. Umabot sa puntong si Den naman ang sinisira ni Luzia pero naging matatag siya.Nilabanan niya ang babaeng umaagaw sa kanyang asawa. Sa bandang huli, nakawala sa gayuma ni Luzia si Vir. Napagtanto ni Vir ang mga nangyari at nagkaroon ng pangalawang pagkakataon ang pagsasama nila ng asawang si Den.

Sa kauna-unahang pagganap niya sa WAGAS, abangan si MEG IMPERIAL bilang si LUZIA kasama sina MARCO ALCARAZ at LOVELY ABELA ngayong Sabado 7PM Sa GMANEWSTV!