Kuwento ng kauna-unahang Pinoy na nakakuha ng same-sex fiancé visa sa Amerika, ilalahad sa 'Wagas'

#WagasLoveWins
Airing date: July 25, 2015
Starring Geof Eigenmann and Carl Guevarra



Nitong nakaraang buwan, naging matunog ang isyu ukol sa same-sex marriage nang maging legal ito sa Amerika. Naging popular ang linyang “Love Wins” sa social media. At dito sa Pilipinas, isang pangalan rin ang nagmarka sa kasaysayan nang siya ang kauna-unahang Pinoy na nabigyan ng same-sex fiancé visa mula sa U.S. Embassy --- siya si  Noel “Aeinghel” Amaro na mapalad na nagkaroon ng “happy ending” kay Robert Cotterman, isang Sundalong Amerikano.



Pero hindi ito simpleng “Beki” love story--- ito ay kuwento ng dalawang nilalang na nakipagsapalaran upang ipaglaban ang kanilang pagmamahalan kahit nasa magkabilang dulo ng mundo. Ito rin ay kuwento ng “first love” at pag-ibig  na walang kasamang panghuhusga.



Mula nang magladlad si Aeinghel noong katorse anyos, hindi lang masasakit na salita mula sa ibang tao ang kaniyang natamo kundi mga pasa mula sa sariling ama. Kaya naman hindi na umasa si Aeinghel na may tunay na magmamahal sa kanya.



Nakilala ni Aeinghel sa internet si Robert-sundalo at mga babae lang ang naging kasintahan. Buong akala niya’y babae rin si Aeinghel. Pero walang inilihim si Aeinghel sa binata. Naging magkaibigan ang dalawa. At kalaunan, nabuo ang pag-ibig para sa isa’t isa.



Makalipas ang limang taon mula nang maging sila ni Robert, nakatanggap si Aeinghel ng hindi inaasahang balita: ipinatawag siya ng embahada ng Amerika sa Maynila. At noong Disyembre ng 2013, si Aeinghel ang naging kauna-unahang bakla sa Pilipinas na nakatanggap ng fiancé visa para makapagkasal sa Amerika.

Tampok sina Carl Guevarra at Geoff Eigenmann, abangan ang makasaysayang pag-ibig nina Aeinghel at Robert na tumawid mula Taguig hanggang Texas ngayong Sabado sa WAGAS, 7 PM, sa GMA News TV!

Para sa karagdangang impormasyon tungkol sa Wagas, silip na sa aming Facebook at Twitter account: