Internet sensation Travis Kraft bilang 'Ang Dayo' sa 'Reel Time'

REEL TIME "Ang Dayo" Airing Date: August 5, 2012, 8:45 PM Para sa Amerikanong internet celebrity na si Travis Kraft, kulang ang cyberspace para ipangalandakan niya sa buong mundo ang kanyang wagas na pagmamahal sa mga Pinoy at sa Pilipinas.   Dating modelo at artista si Travis, pero higit siyang nakilala sa kanyang patok na YouTube video tungkol sa pagluluto ng adobong manok!   Simula noon, halos naging misyon na nga raw ni Travis ang paglikha ng mga video na nagpapakilala sa makulay na kultura at angking ganda ng Pilipinas --- mula sa pagpasyal niya sa Binondo, hanggang sa pagkahilig natin sa basketball, boksing at pati sa sabong!   Sa dinami-rami nga ng mga video na ginawa ni Travis, isang araw, hinamon namin ang tibay ng kanyang "pagmamahal" sa ating bayan ---- sa pamamagitan ng pagtira sa isa sa mga pinakamahirap na lugar sa Kalakhang Maynila.   Sa loob ng ilang araw, titira si Travis sa isang floating house --- o bahay na pinalulutang sa pamamagitan ng styrofoam! Susubukan din niyang makipag-barter sa mga barko sa Manila Bay at makipagbulungan sa Navotas Fish Port!   Matagalan kaya niya ang hirap ng buhay ng isang informal settler sa siyudad? Handa ba siya sa matinding panganib na maidudulot nito sa kanyang kalusugan?   Mamahalin pa rin ba niya ang Pilipinas oras na makilala niya ang totoong mukha ng kahirapan sa ating bayan?   Samahan natin si Travis sa isang biyaheng naging mitsa na halos ng kanyang buhay. Ngayong August 5, linggo, 8:45 ng gabi sa Reel Time GMA News TV Channel 11. _{Sundan ang Reel Time sa Facebook at sa Twitter!}