Sirang tulay na itinampok sa Investigative Documentaries, babalikan ngayong Huwebes

Tugon
29 September 2016 Episode

Alas tres ng madaling araw gising na ang mga bata sa Barangay Latag, Nasugbu Batangas. Tatlong oras kasi silang maglalakad pababa ng bundok para makarating sa pinakamalapit na eskwelahan sa kanilang lugar.

Banta sa buhay ng mga bata ang sirang tulay sa ilog ng Mayamut-yamot. Pebrero 2016 ginawa ang tulay at sinimulang gamitin nitong Abril. Pagkatapos ng dalawang buwan ay sira na ang ilang bahagi nito. Ginastusan ito ng mahigit P100,000 mula sa Internal Revenue Allotment (IRA) ng barangay.

Matapos ipalabas noong Hulyo ang kondisyon ng mga estudyante at guro, ipinagawa ng lokal na pamahalaan ng Nasugbu ang sirang tulay.

Abangan ang sitwasyon ng iba pang problemang idinulog sa ID. Alamin kung nabigyan ng solusyon o hindi ang mga ito.

Huwag kaliligtaang tumutok ngayong Huwebes sa Investigative Documentaries, alas otso ng gabi kasama ang 2013 Metrobank Journalist of the Year na si Malou Mangahas sa GMA News TV Channel 11.