Mga modus sa lansangan, alamin sa 'Brigada'

BRIGADA
October 2, 2018
8 pm sa GMA News TV

MODUS SA LANSANGAN?

Viral kamakailan ang mga video ng mga nambibiktima ng mga motorista’t pasahero na naiipit sa buhul-buhol na trapiko.

Kung hindi man pilit na binubuksan ang pintuan ng mga sasakyan, lantaran nila itong pinapasok para pagnakawan ang mga pasahero nito.

Ang nakababahala, pawang mga kabataan ang karamihan sa mga nahu-hulicam na sumasalakay sa mga sasakyang ito. Sinubukang tuntunin ni Oscar Oida ang mga nasa likod ng nakunang nakawan sa lansangan.

BANGUS CRISIS?

Matapos ang bigas, gulay, at iba pang mga pangunahing bilihin, tila nakikiuso naman sa pagtaas-presyo ngayon ang bangus sa iba’t ibang mga pamilihan.

Mula mahigit isandaang piso, aabot na ngayon sa halos dalawandaang piso ang presyo nito kada kilo, at may posibilidad pa ring tumaas dahil sa napipintong pagnipis na suplay nito sa merkado.

Wala namang magawa ang mga mamimili kundi magtiis at maghigpit ng sinturon sa tila panibago na namang yugto ng pagtaas ng presyo ng mga bilihin. Kinumusta ni JP Soriano ang mga apektado ng pagtaas ng presyo ng bangus sa palengke.