Nauwi sa habulan ang pagharang ng mga pulis sa isang lasing na driver sa Sheffield, England. Pero ang talagang nakapigil sa suspek, isang matinik na police dog.
Sa video na ilabas ng pulisya na mapapanood sa GMA News Feed, makikita ang pagharurot ng sasakyan na una nilang sinita.
Kung saan-saan sumuot ang driver ng kotse para matakasan ang mga awtoridad.
Pero nang masukol na siya, ibinangga ng suspek ang sasakyan sa bakod at kumaripas muli ng takbo para takasan pa rin ang mga pulis.
Muli na naman siyang hinabol ng mga pulis, pero sa pagkakataong ito, kasama na ang k-9 o police dog.
Sa tulong ng aso, nahuli ang suspek na si Ballal Hussain.
Ayon sa South Yorkshire Police, idinahilan ni Hussain na lasing siya nang mangyari ang insidente.
Mahaharap si Hussain sa kasong dangerous driving na may parusang pagkabilanggo ng hanggang 21 buwan.--FRJ, GMA News
