Sa pagtatapos ng 2023, balikan ang mga celebrity na nagsilang kani-kanilang supling, kabilang ang first time mom na sina Kris Bernal, Iza Calzado, at sister-in-law niyang si Bianca King.
Pinangalanan ni Kris ang ang panganay nilang anak ni Perry Choi na si Baby Hailee Luca, na isinilang noong Agosto.
"My heart is so full and becoming a mother is the most rewarding and beautiful thing in my life. Thank you, Lord, for giving us a chance to be parents!” ani Kris sa isang post.
Welcome to motherhood din kay Iza Calzado na naramdaman ang pagiging buo at fulfilled niya sa pagiging ina kay Baby Deia Amihan.
Isinilang ni Iza si Baby Deia Amihan noong Enero, na hango ang pangalan sa karakter na ginampanan ng aktres sa Kapuso series na "Encantadia."
Taong 2018 nang ikasal si Iza kay Ben Wintle.
Sa naturang kasal, nakilala naman ni Bianca King ang kapatid ni Ben na si Ralph, na kaniyang napangasawa.
This year din, iniluwal ni Bianca ang first baby nila ni Ralph na si Sadie Harlow.
Isinilang naman ng Filipino theater actress na si Rachelle Ann Go noong March ang second baby niya na si Sela Teruah Spies.
"Blessed to introduce Sela Teruah Spies," ani Rachelle sa isang post. Kasabay nito ay ipinaliwanag niya na ang kahulugan ng Sela ay "rock, to pause or reflect," habang ang Teruah naman ay "shout or trumpet blast."
Patuloy naman ang paglaki ng Triviño family, matapos na isilang ni Joyce Pring, ang second baby nila ni Juancho na si Baby Aggie noong April.
Pebrero noong 2020 nang ikasal sina Joyce at Juancho. Lalaki ang una nilang anak na si Alfonso Eliam, na isinilang isang taon matapos silang ikasal.
Isinilang naman ni Isabelle Daza ang ikatlong anak nila ni Adrienne Semblat, na si Baby Esmeralda Gloria, na isinunod ang pangalan sa ina ng aktres na si Gloria Diaz.
Lumalaki rin ang pamilya nina Karel Marquez at Sean Fariñas, makaraang isilang ng aktres ang ikaapat niyang baby noong June si Kaden Andrei.
"Our newest love as a fam of 6.... Our Kaden Andrei - such a blessing, our precious baby," saad ni Karel sa isa niyang post.
Baby boy din ang naging anak nina Lovely Abella at Benj Manalo na pinangalanan nilang Liam Emmanuel.
Nag-viral pa ang no filter photo ni Lovely habang nagpapa-breastfeeding sa kaniyang baby.
Winelcome din ni Valerie Concepcion at mister niyang si Francis Sunga ang kaniyang baby boy na si Viktor Francis, na isinilang noong Oktubre.
Ikinasal sina Valerie at Francis noong 2019. --FRJ, GMA Integrated News
