Nagliyab ang isang motorsiklo matapos sumalpok sa isang minivan sa Banga, South Cotabato. Ang minivan, tumagilid naman.
Sa ulat ng GMA News 24 Oras Weekend nitong Linggo, sinabing nasawi ang rider ng motorsiklo.
Malubha naman ang tinamong pinsala ng isa sa mga sakay ng minivan, at sugatan din ang lima pa niyang kasama.
Ayon sa driver ng minivan na nasa kostudiya ng mga awtoridad, biglang nag-swerve sa gitna ng kalsada
ang kasalubong nilang motorsiklo.
Kinabig niya ang sasakyan para iwasan ang motorsiklo na dahilan kaya tumagilid ang kanilang minivan.
Patuloy umano ang imbestigasyon ng pulisya sa insidente. -- FRJ, GMA Integrated News
