Nasawi ang isang rider matapos na sumalpok ang minamaneho niyang motorsiklo sa kasalubong na dump truck sa Sarrat, Ilocos Norte.
Sa ulat ng GMA Regional TV One North Central Luzon nitong Miyerkules, lumitaw umano sa imbestigasyon ng pulisya na binabaybay ng motorsiklo at truck ang magkabilang direksyon ng kalsada sa Barangay San Miguel.
Subalit napalipat umano sa kabilang linya ang rider kaya bumangga ang motorsiklo nito sa kasalubong na truck.
Sa lakas ng pagbangga, tumilapon ang rider at nagtamo ng matinding sugat sa ulo. Hindi na siya umabot nang buhay sa pagamutan.
Sumuko naman sa pulisya ang driver ng truck na mahaharap sa kaukulang reklamo.-- FRJ, GMA Integrated News
