Nahuli-cam ang pagsalpok ng isang nag-overtake na van sa kasalubong nitong truck mula sa kabilang lane sa Labo, Camarines Norte.
Sa ulat ni CJ Torida ng GMA Regional TV sa Balitanghali, mapanonood ang puting van na nasa likod ng isang itim na SUV sa Maharlika Highway.
Ilang saglit lang, tinangkang mag-overtake ng van, ngunit sumalubong dito ang truck galing sa kabilang lane.
Nagkabanggaan ang dalawa kung saan umikot ang van samantalang tumagilid ang truck.
Wala namang nadamay na ibang kotse.
Sumiklab din ang apoy sa truck habang nayupi ang harapang parte ng van.
Patuloy na inaalam ang detalye galing sa mga driver, na parehong sugatan. — Jamil Santos/RSJ, GMA Integrated News
