Nasawi ang isang rider at kaniyang angkas matapos na sumalpok sa nakasalubong na AUV (Asian utility vehicle) ang sinasakyan nilang motorsiklo sa Rosario, Cavite.
Sa ulat ng GMA News Unang Balita nitong Lunes, sinabing kaagad na nasawi ang mga biktima sa General Trial Drive nitong madaling araw ng Linggo.
Lumabas sa imbestigasyon na nag-ovetake umano ang mga biktima sa isa pang motorsiklo hanggang sa makasalubong nila sa kabilang linya ng daan ang AUV at makasalpukan.
Napag-alaman ng mga awtoridad na walang plaka at OR/CR ang motorsiklo na gamit ng mga biktima.
Hindi nagbigay ng pahayag ang driver ng SUV.-- FRJ, GMA Integrated News
