Nakuhanan ng video ang ginawang pagtangay ng isang kawatan sa bag ng isang busker na abala sa pagtatanghal sa Bacolod City.
Sa ulat ng GMA Regional TV One Western Visayas sa Balitanghali ng GTV nitong Miyerkoles, makikita sa video ang kawatan na kinuha ang bag na nasa likuran ng biktima.
Ayon sa busker na si Lex Chavez, na nasa loob ng bag ang dalawang cellphone, pera, camera at ilang equipment.
Ini-upload ni Chavez ang video sa kanilang social media account para matukoy ang pagkakakilanlan ng kawatan.
Nakita na ang bag ngunit wala na ang pera at cellphone ng biktima.
Natukoy na rin ng mga pulis ang pagkakakilanlan ng nagnakaw sa busker. --Jamil Santos/FRJ, GMA Integrated News
