Nasawi ang apat na miyembro ng isang pamilya na sakay ng motorsiklo matapos silang mabangga ng nag-overtake na truck sa Caibiran, Biliran.
Sa ulat ni James Agustin sa Unang Balita nitong Martes, sinabing hindi napansin ng driver ng truck ang kasalubong na motorsiklo ng pamilya kaya nabangga niya ito.
Tumilapon sa lakas ng pagkakabangga ang mga biktima, na nagkaroon ng malubhang sugat at bali sa katawan.
Dinala ang mga biktima sa ospital pero binawian ng buhay kalaunan.
Nasa kustodiya na ng pulisya ang driver na hindi nagbigay ng pahayag. —Jamil Santos/VBL, GMA Integrated News
