Isang bagong silang na sanggol ang inabandona at natagpuan sa gilid ng kalsada sa Bulan, Sorsogon.
Sa ulat ng GMA Regional TV News nitong Lunes, sinabi ng mga awtoridad na nakabalot sa kumot ang sanggol nang nakakita ito ng dumaan na residente sa Barangay G Del Pilar ng nasabing munisipyo.
Agad na rumesponde sa lugar ang mga awtoridad at nakitang buhay ang sanggol.
Nasa ospital sa ngayon ang sanggol, na isinailalim sa pangangalaga ng Department of Social Welfare and Development.
Patuloy na inaalam ang pagkakakilanlan ng mga magulang ng sanggol na posibleng nag-iwan sa kaniya sa lugar.
Nagpaalala ang mga awtoridad na maaaring maharap sa kaso ang taong nag-abandona sa sanggol.--Jamil Santos/FRJ, GMA Integrated News
