Natagpuan kamakailan na wala nang buhay sa loob ng kulungan ng mga baboy sa New Washington, Aklan ang isang bagong silang na sanggol. Ang mga kamay nito, wala na.
Sa ulat sa GMA Regional TV News nitong Huwebes, sinabing isang lalaking magpapakain sana ng dalawang alagang baboy ang nakakita sa sanggol noong umaga ng Disyembre 26.
Nakakabit pa ang umbilical cord ng sanggol nang makita. Wala itong damit at putol ang dalawang kamay na pinaniniwalaang nilapa ng baboy.
Batay sa imbestigasyon ng pulisya, gabi bago natagpuan sanggol, may narinig ang anak ng may-alaga ng mga baboy na tila umiiyak sa labas ng kanilang bahay.
Pero wala naman daw silang nakita nang sumilip sila sa labas ng bahay. Bukod pa rito, malakas din umano ang ulan at madilim sa paligid.
Ayon pa sa ulat, hiniling ng pulisya na isailalim sa autopsy ang bangkay ng sanggol upang malaman ang sanhi ng kanyang pagkamatay.
Patuloy din ang imbestigasyon para malaman kung sino ang nag-iwan sa sanggol.--Mel Matthew Doctor/FRJ, GMA Integrated News
