Arestado ang apat na electrician sa Ilocos Sur matapos silang makunan ng CCTV na nagnanakaw umano sa dati nilang pinagtrabahuhan, ayon sa ulat ng Unang Balita mula sa GMA Regional TV One North Central Luzon nitong Biyernes.
Kita sa video ang pagpasok ng mga suspek sa isang bahay sa bayan ng Santa. Batay sa imbestigasyon, nagbabakasyon sa ibang lugar ang mag-asawang nakatira sa nasabing bahay.
Pagbalik daw ng mag-asawa ay nakita nilang nakakalat ang kanilang mga gamit at wala na ang halos P500,000 na cash nila.
Nang tignan ang CCTV, doon natukoy na ang mga suspek ay mga electrician na dati nang nagtrabaho sa bahay.
Tumangging magsalita sa media ang mga suspek, pero ayon sa mga pulis sinabi raw ng mga suspek na kailangan nila ng pera kaya nila nagawa ang krimen. —KBK, GMA Integrated News
