Patay ang apat na tao, habang sugatan ang tatlong iba pa makaraang masalpok ng isang truck ang dalawang tricycle na kasalubong nito sa Maharlika Highway, Barangay Ikirin, Pagbilao, Quezon.
Base sa report ng Pagbilao Municipal Police Station, sinalpok ng elf truck ang dalawang tricycle na lulan ang pitong tao kabilang ang isang bata, dakong alas-nuebe ng umaga.
Nagtamo ng matinding pinsala ang mga biktima, ayon sa PNP.
Nasapul ng CCTV ang insidente, at sa video makikitang biglang sinalubong at pumasok sa linya ng truck ang tricycle, kaya nasalpok ito at ang kasunod na isa pang tricycle.
Makikita sa mga larawan ang nagkalat na katawan ng tao sa highway matapos tumilapon ang mga sakay makaraang masalpok ang mga tricycle.
Halos magkahiwa-hiwalay naman ang mga parte ng tricycle dahil sa lakas ng impact ng salpukan.
Mabilis na na-rescue ang mga biktima at isinugod sa pagamutan ang mga sugatang pasahero ng tricycle.
Patuloy ang isinasagawang imbestigasyon ng Pagbilao Municipal Police Station. Hawak na rin ng kapulisan ang driver ng truck na hindi pa raw handang magbigay ng pahayag. —LBG, GMA News
