Nasawi ang isang 19-anyos na estudyante nang masalpok ng isang SUV ang minamaneho niyang motorsiklo sa Pozorrubio, Pangasinan.
Sa ulat ni Russel Simorio sa GMA Regional TV "Balitang Amianan" nitong Biyernes, makikita sa kuha ng CCTV camera sa Barangay Alipangpang na paliko papunta sa isang kalsada ang biktima nang salpukin siya ng SUV.
Sa lakas ng pagkakabangga, tumilapon ang biktima at nawasak ang motorsiklo.
Ayon sa pulisya, tumama pa ang biktima sa windshield ng SUV, at hindi na umabot nang buhay sa ospital.
Nasa kostudiya naman ng pulisya ang driver ng SUV na mahaharap sa reklamong reckless imprudence resulting to homicide.
Sinusubukan pang makuha ang pahayag ng driver ng SUV at pamilya ng rider, ayon sa ulat. --FRJ, GMA News
