Nahuli-cam ang pagsalpok ng isang motorsiklo sa nakasalubong na police car sa pakurbadang daan sa Laoag City, Ilocos Norte.
Sa ulat ni Tere Sundayon sa GMA Regional TV "Balitang Amianan" nitong Lunes, makikita sa video na mabilis ang takbo ng motorsiklo sa pababang bahagi ng pakurbadang daan sa Barangay Calayab.
Sa pagliko nito, napunta na ang motorsiklo sa kabilang bahagi ng kalsada na saktong paparating naman ang kasalubong na police car na kaniyang sinalpok.
Sa lakas ng pagbangga, tumilapon ang angkas ng motorsiklo.
Ayon sa pulisya, parehong nakainom ang dalawang sakay ng motorsiklo at wala silang suot na helmet.
Napag-alaman na residente ng San Nicolas ang rider at angkas niya na parehong dinala sa ospital dahil sa pinsalang tinamo sa katawan.
Inoobserbahan din ang kondisyon ng dalawang pulis na sakay ng police car, ayon sa ulat.
Patuloy umano ang isinasagawang imbestigasyon ng mga awtoridad sa insidente.--FRJ, GMA News
