Sapul sa CCTV camera ang ilang aksidente sa Dasmarinas, Cavite. Kabilang dito ang pagtilapon ng isang rider sa kabilang bahagi ng highway matapos siyang mabangga ng isang van.
Sa ulat ng GMA News "Unang Balita" nitong Martes, makikita sa CCTV footage ang dahan-dahan na pagliko ng van sa Aguinaldo highway hanggang sa mabangga ang dumarating na motorsiklo.
Tumilapon ang rider sa kabilang bahagi ng highway at mabuti na lang ay walang dumaan na sasakyan at hindi siya nasagasaan.
Kaagad namang nakabangon ang rider at nakipag-usap sa driver ng van.
Sa Congressional Road naman, dalawang rider ang nagbanggaan nang biglang lumiko ang isang closed van.
Biglang tumigil ang rider nang lumiko ang van, habang hindi naman kaagad nakatigil ang kasunod niyang rider kaya nagbanggan sila at parehong natumba.
Sa Dano Intersection, nakatigil ang mga sasakyan habang naghihintay ng "go" signal nang biglang umandar ang isang SUV.
Tinamaan ng SUV ang kotse na nasa harapan niya. Tumama naman ang kotse sa isang motorsiklo at tumilapon ang rider.
Sinubukan ng rider na tumayo pero napaupo siya ulit. Ayon sa ulat, dinala ang rider sa ospital. --FRJ, GMA News
