Nagpapatuloy ang isinasagawang COVID-19 vaccination ng Lucena City Health Office sa lalawigan ng Quezon.
Araw-araw ay daan-daang residente ng lunsod ang pumipila upang magpabakuna.
Isa sa mga lugar kung saan idinadaos ang vaccination ay sa apat na sinehan ng isang malaking mall sa Lucena City.
Nitong Biyernes, October 29, 2021, upang maging masaya ang vaccination sa mall ay naisip ng mga vaccinator, staff, at volunteers na magsuot ng Halloween costume.
Kinagiliwan ito ng mga nagpapabakuna at mallgoers.
Bago magsimula ang bakunahan ay umikot muna sa mall ang mga vaccinator. Ang iba ay naka Squid Game outfit, ang iba naman ay zombies, bampira, mangkukulam, at aswang.
Ayon sa vaccinators, araw araw na ang kanilang gagawing vaccination hanggat may dumarating na supply ng bakuna.
Plano daw nilang magsuot naman ng iba’t ibang Christmas costume sa pagpasok ng buwan ng Disyembre. —LBG, GMA News
