Nailigtas ang 11 kababaihan mula sa dalawang spa na nag-aalok ng "extra service" o prostitusyon sa Antipolo City.

Sinabi ng Antipolo City LGU na sabay na ni-raid ng Philippine National Police (PNP) Women and Children Protection Center at ng city social workers ang Nitzi Touch Massage Spa at Miyuto Spa sa Barangay Mayamot, ayon sa ulat ng Super Radyo DZBB nitong Sabado.

Isinagawa ang operasyon matapos malaman ng mga awtoridad na nag-aalok din ng "extra service" o sexual service ang mga spa bukod sa masahe sa halagang P2,000 sa mga customer.

Taga-Quezon City ang anim sa mga nasagip, habang taga-Antipolo ang lima pa.

Nasa Kampo Crame na ang mga babae habang patuloy ang imbestigasyon.

Sumailalim na rin sila sa assessment ng social worker upang malaman kung kailangan silang iendorso sa shelter o ibabalik na lamang sa kanilang mga pamilya at bibigyan ng posibleng tulong o kabuhayan. —Jamil Santos/LBG, GMA News