Tinakbuhan ng isang driver ng AUV ang gasoline station sa Victoria, Laguna matapos itong magpa-full tank.

Iniulat ng “Unang Hirit” nitong Biyernes na matapos magpa-full tank, kumuha pa umano ang driver ng gallon at pati iyon ay pinalagyan niya ng gasolina.

Pinaandar agad ng driver ang sasakyan matapos mapuno ang gallon at hindi na ito nagbayad.

Sinubukan pang habulin ng gas boy ang sasakyan, ngunit tuloy-tuloy lamang sa pag-arangkada ang AUV.

Aabot umano sa P1,000 ang halaga ng gasolinang naitakbo ng driver. —LBG, GMA News